കൊച്ചി: പത്താം ക്ലാസ് പരീക്ഷയിൽ ഉന്നത വിജയം നേടിയവർക്കായി പി.എം ഫൗണ്ടേഷൻ നടത്തുന്ന ടാലൻറ് സെർച് പരീക്ഷക്ക് ജൂൺ 20 വരെ അപേക്ഷിക്കാം. 2025ലെ എസ്.എസ്.എൽ.സി/ ടി.എച്ച്.എസ്.എൽ.സി പരീക്ഷയിൽ മുഴുവൻ വിഷയത്തിലും എ പ്ലസ് ഗ്രേഡ് നേടിയ വിദ്യാർഥികൾ, സി.ബി.എസ്.ഇ/ ഐ.സി.എസ്.ഇ പരീക്ഷയിൽ ഓരോ വിഷയത്തിലും 90 ശതമാനം മാർക്ക് നേടിയ വിദ്യാർഥികൾ എന്നിവർക്ക് അപേക്ഷിക്കാം.
കൂടാതെ സംസ്ഥാന-ദേശീയതല മത്സരങ്ങളിൽ (കായികം, കലാ സാംസ്കാരികം, നേതൃത്വം, സാമൂഹിക സേവനം, വിവരസാങ്കേതികം) വിജയികളായവർക്ക് എസ്.എസ്.എൽ.സി/ ടി.എച്ച്.എസ്.എൽ.സി പരീക്ഷയിൽ മുഴുവൻ വിഷയത്തിലും കുറഞ്ഞത് എ ഗ്രേഡും അല്ലെങ്കിൽ സി.ബി.എസ്.ഇ/ ഐ.സി.എസ്.ഇ പരീക്ഷയിൽ എല്ലാ വിഷയത്തിലും കുറഞ്ഞത് 80 ശതമാനം മാർക്കും ഉണ്ടെങ്കിൽ അപേക്ഷിക്കാം.
വിശദാംശങ്ങൾ www. pmfonline.org എന്ന വെബ്സൈറ്റിൽ. വിവിധ ജില്ലകളിൽ പരീക്ഷാകേന്ദ്രങ്ങൾ ഉണ്ടാകും. അടിസ്ഥാന ശാസ്ത്രം, സാമൂഹികശാസ്ത്രം, പൊതുവിജ്ഞാനം, ജനറൽ ഇന്റലിജൻസ് തുടങ്ങിയ വിഷയങ്ങളിലുള്ള പത്താം ക്ലാസ് നിലവാരത്തിലുള്ള ചോദ്യങ്ങളാണ് രണ്ടുമണിക്കൂർ ദൈർഘ്യമുള്ള ഒബ്ജക്ടിവ് പരീക്ഷയിൽ ഉണ്ടാവുക.
നിശ്ചിതമാർക്ക് നേടുന്നവർക്ക് കാഷ് അവാർഡും സാക്ഷ്യപത്രവും നൽകും. ഇതിനുശേഷം തെരഞ്ഞെടുക്കപ്പെടുന്ന വിദ്യാർഥികൾക്ക് ക്യാമ്പും പിന്നീട് ഇന്‍റർവ്യൂവും ഉണ്ടാകും. ഇതിൽനിന്ന് തെരഞ്ഞെടുക്കുന്ന വിദ്യാർഥികൾക്ക് ഉന്നത വിദ്യാഭ്യാസത്തിനായി അഞ്ചുവർഷം വരെ പി.എം ഫെലോഷിപ് നൽകും. ഫോൺ: 0484 2367279 , +91 751 067 2798.